Mælingamenn með þumla

Sú var tíðin að ég ætlaði mér að verða húsasmiður.  Eftir rúmt ár í námi og hálft ár við smíðar hjá fyrirtæki þá rann upp fyrir mér ljós.  Mér hafði verið úthlutað ríflegar af þumlum heldur en flestum öðrum og því ekki annað fyrir mig að gera heldur en að finna mér annað viðurværi, sem ég og gerði.  Engu að síður lærði ég eitt og annað af þeim miklu völundum sem reyndu sitt besta til að gera úr mér nothæfan smið.  Eitt af því sem situr fast í kolli mínum kom frá fullorðnum smið sem fylgdist einhverju sinni með mér saga borðvið í klæðningu af miklu kappi en lítilli forsjá.  Eftir ítrekaða handvömm mína kom sá gamli til mín og sagði: “Hér gildir að mæla tvisvar en saga einu sinni.”

 

Undanfarna daga hefur þessi ábending dúkkað upp í kolli mínum.  Ástæðan er sú hvernig komið er fyrir bankakerfi landsmanna svo skömmu eftir að hvert spekingateymið á fætur öðru hafði gefið bönkunum heilbrigðisvottorð.

 

Til upprifjunar minni ég á að matsfyrirtækin þrjú, Moody’s Investors Service, Fitch Ratings og Standard & Poor’s töldu í september að stóru viðskiptabankarnir þrír væru, þrátt fyrir versnandi stöðu, hreint ekki illa settir.  Á sömu nótum var niðurstaða Fjármálaeftirlitsins um miðjan ágúst eftir að hafa framkvæmt svokallað álagspróf.  Óþarft er að rifja það upp að viðskiptabankarnir eru allir þrír farnir á hausinn.

 

Hvert er hlutverk þessarra fyrirtækja og stofnana og hvernig rísa þau undir því hlutverki sínu?  Getur verið að við þurfum að leita eftir matsfyrirtækjum til að siga á matsfyrirtækin?

Athugasemdir

[Jórunn Sigurbergsdóttir , 16.10.2008 kl. 19:56]

Þetta var gott ráð hjá þeim gamla.

[Haraldur Haraldsson, 16.10.2008 kl. 22:57]

Já þessi er góður og gyldur!!!!Það var lika sagt einu sinni um verkfræðing frá USA að þeir væru kanski fimm ár  að teikna og reikna en bara ár að byggja ,en þetta væri öfugt herna á Íslandi/Halli gamli

[Ævar Rafn Kjartansson, 17.10.2008 kl. 13:30]

Þettar er algild regla í smíðunum. kannski væri þjóðin betur sett með húsasmíðameistara en dýralækni í fjármálaráðuneytinu.